Víravegriðið á Suðurlandsvegi safnar snjó á veginn

Komst Suðurlandsveginn til vinnu í morgun þó að ég væri aðeins seinna á ferðinni en venjulega. Var kominn í Hafnarfjörðinn um kl. 11. Kolvitlaust veður á leiðinni og skyggni nánast ekki neitt. Slæmt á Hellisheiði en enn verra í Svínahrauni og á Sandskeiði.

Ég ferðast daglega á milli Selfoss og Hafnarfjarðar og er búinn að gera undanfarin ár og þetta er eitt versta veður sem ég hef lent í á leiðinni og það alversta í vetur.

Það vakti athygli mína, nú þegar kom alvöru skafrenningur, hversu fljótt hlóðst snjór á 2 + 1 veginn í Svínahrauninu. Víravegriðið á milli virtist ná að safna verulegum snjó á veginn en það er einmitt það sem margir, sem gangnrýnt hafa 2 + 1 lausnina, hafa verið að benda á  að myndi gerast ef að harðir vetur kæmu.

Þessi ferð sannaði fyrir mér að þeir sem haldið hafa slíku fram hafa talsvert til síns máls.

Suðurlandsvegi lokað austur af Norðlingaholti

Athugasemdir

[Grímur Gíslason, 20.3.2007 kl. 18:20]

Nei ekki er nú svo að ég hafi bara komið auga á þetta í einni ferð. Það hefur oft örlað á þessu en í morgun var þetta mjög afdráttarlaust, enda veðrið afar slæmt og skafrenningur mikill. Mun meiri en áður í vetur.

Ég er heldur ekkert að meta málið á neinum forsendum heldur einungis að benda á að þeir sem hafi haldið þessu fram hafi talsvert til síns máls. Annað ekki.

[Helgi Jónsson, 20.3.2007 kl. 22:15]

Ég er sammála þér Grímur með víravegriðin. Ég var þarna á ferð í morgun og það vakti athygli mína hversu mikið kóf var þarna í kringum vegriðin þó það væri ekki mikill skafrenningur á þeim stað. En hins vegar varð bylurinn fyrst blindur við Litlu kaffistofuna sem enn einu sinni varð bjargvættur margra ferðalanga. Þaðan og alla leið að Geithálsi sá maður ekki ljósin á bílnum á undan ef bilið var meira en bíllengd.